رواية انا له الفصل السادس
مرة وفي النهاية غلبني شوقي ورديت
فتحت الخط وفضلت ساكته
_ الو... نورا اخيرا رديتي
_عايز ايه
_انا في العربيه تحت انزلي
_ مش نازلة ولو سمحت امشي من هنا يا محمد ومش عايزة اشوف وشك تاني
_ انزلي يا نورا عشان خاطري... المرة دي بس انزلي
قفلت الموبايل وانا ببص من البلكونة لقيت عربيته تحت
كنت عايزة اجري عليه بس في نفس الوقت مش عايزة اشوفه
بعدها بشوية نزلت مقدرتش اقاوم شوقي ليه وجريت عليه زي العبيطة
نيرة وائل
وقفت جمب العربية لقيته ساند راسه على الدركسيون فتحت الباب وركبت بصلي بلهفة
_ انتي كويسة وحشتيني اوي
لفيت وشي الناحية التانيه واتكلمت بجمود
_عايز ايه
_عايزك ترجعي بيتك
روحي جهزي شنطتك يلا
_ والله
_ نورا عشان خاطري يلا... من ساعة ما سبتي البيت وبابا تعبان
على الاقل ارجعي عشان عمك
_ انا لسه مكلمة عمي وهو متفهم الوضع خليك في نفسك انت
فتحت باب العربية وكنت لسه هنزل بس مسك ايدي
_ بلاش تعملي كدا
بعدت ايده ونزلت لقيته نزل ورايا وشدني مرة تانيه وحضني
_ نورا انا مش هقدر اعيش من غيرك
_ اياك تفكر تقرب مني ولا تلمسني تاني... اياك يا محمد
مسك خده بإيده وضحك
_ بس انتي متقدريش تعيشي بعيد عني... انتي ضعيفة يا نورا ضعيفة وطول عمرك وحيدة مش هتعرفي تكملي حياتك من غيري وهترجعي... انتي دايما محتاجة ليا في حياتك
حطيت ايدي على وداني ودخلت البيت بسرعة لكن وانا داخله لاحظت خالد واقف في البلكونة بيتفرج وهو بيشرب سيجارته ومبتسم مهتمتش بيه وجريت طلعت اوضتي
محمد عنده حق في كل كلمه قالها انا ضعيفة من غيره
انا مقدرش اعيش بعيد عنه هو كل في حياتي
زي ما بيقولوا كدا هو محور الكون بالنسبالي
قاطعني صوت خبط على الباب كانت ماما
مسحت وشي عشان متاخدش بالها اني كنت بعيط وفتحت
_ ايه يا نورا هتفضلي قاعدة لوحدك علطول كدا... ايه دا انتي كنتي بټعيطي
_ لا.. مفيش حاجه
شدتني من ايدي وقعدنا على السرير
_ انتي فيكي حاجه مش طبيعية... ولحد دلوقتي معرفتش انتي كنتي سايبة البيت ليه وكنتي عند مين
_ مفيش حاجه يا ماما قولتلكم اني كنت عند واحدة صحبتي
_ وابن عمك قال انه معندكيش صحاب
_ ماما لو سمحتي انا عايزة انام ممكن تسيبيني
_ انا عارفه اننا بعيد عن بعض بس دا ميمنعش إني امك
احكيلي فيكي ايه يا عيوني... عيطي في حضڼي متعيطيش لوحدك
بدأت اعيط فعلا بس مش عشان حد... عشان حسيت ان كلام محمد غلط واني مش لوحدي انا عندي حد غيره اعيط في حضنه
في حد تاني بيحبني هنا
_ احكيلي يا نورا يلا ايه اللي مزعلك يا حبيبتي
عياطي
زاد اكتر لكن بدأت احكيلها كل حاجه انا كنت محتاجة حد اتكلم معاه
_ كل دا حصل وانتي ساكتة وكاتمة في قلبك
_ وجعني اوي يا ماما... انا مش عارفه هكمل ازاي من غيره
مش هستحمل اشوفه مع غيري
_ دا بني ادم متخلف انتي ازاي مكملة في ۏجع القلب دا
ازاي زعلانه عليه اصلا... اللي زي دا ميستاهلش دمعة منك اصلا
_الكلام سهل يا أمي لكن الفعل صعب اوي... انسى روحي ازاي
_ هتنسي وهتعيشي وكل ده هيعدي وبكرة تقولي ماما قالت
بس المهم انتي تكوني عايزة دا... تكوني عايزة تنسي وتكملي حياتك
مش تفضلي واقفة مكانك وپتبكي
_ ماما انا مش عايزة ارجع البيت تاني خليني معاكي هنا
حضنتي بقوة وعيونها دمعت
_ مش هسيبك ترجعي اصلا كفاية إني اتحرمت منك كل دا
نيرة وائل
_______________________________
جه الليل وحسيت اني بقيت احسن شوية لما ماما اثبتت ليا عكس اللي محمد قاله... اكتشفت انه عندي ناس بتحبني هنا ويقدروا يدعموني وفهمتني انه محمد مؤذي.. قلبي رافض يستوعب الحقيقة دي لكن عقلي مصدقها كويس
بس كنت إلى حد ما مرتاحة نفسيا النهاردة
بعد تفكير كتير عنيا راحت في النوم بس حسيت بحد واقف قدامي
وقبل ما افتح عنيا كان حط مخدة على وشي كتم بيها نفسي و......
يتبع
